റഷ്യക്കാര്‍ക്ക്‌ എല്‍.പി. സ്‌കൂള്‍ വിദ്യാര്‍ഥികളുടെപോലും വിവരമില്ല!

മനുഷ്യനെ ആദ്യമായി ശൂന്യാകാശത്ത്‌ എത്തിച്ചവരാണ്‌ റഷ്യക്കാര്‍. എന്നാല്‍, സൂര്യന്‍ ഭൂമിക്കു ചുറ്റും ഭ്രമണം ചെയ്യുകയാണെന്നാണ്‌ മൂന്നിലൊന്നു റഷ്യക്കാരും വിശ്വസിക്കുന്നത്‌. റഷ്യക്കാര്‍ക്കിടയില്‍ നടത്തിയ ഒരു സര്‍വേയിലാണ്‌ എല്‍.പി. സ്‌കൂള്‍ വിദ്യാര്‍ഥികളുടെ വിവരംപോലും 32 ശതമാനത്തോളം റഷ്യക്കാര്‍ക്കില്ലെന്നു കണ്ടെത്തിയത്‌. 15-ാം നൂറ്റാണ്ടിലൊന്നുമായിരുന്നില്ല ഈ സര്‍വേ നടന്നത്‌. കഴിഞ്ഞ മാസം റഷ്യയിലെ വിവിധ ഭാഗങ്ങളില്‍ നടത്തിയ സര്‍വേയിലാണ്‌ റഷ്യക്കാരുടെ വിവരക്കേട്‌ പുറത്തുവന്നത്‌. ഒരു റഷ്യന്‍ പത്രമാണ്‌ തങ്ങളുടെ നാട്ടുകാരുടെ വിവരം അളക്കാമെന്നു വിചാരിച്ച്‌ സര്‍വേ നടത്തിയത്‌. ഇതിലാണ്‌ സൗര്യയുഥത്തിന്റെ കേന്ദ്രം ഭൂമിയാണെന്ന റഷ്യന്‍ കണ്ടെത്തല്‍ പുറത്തുവന്നത്‌. റേഡിയോ ആക്‌ടിവിറ്റി മനുഷ്യനിര്‍മിതമാണെന്നാണ്‌ പകുതിയിലേറെ റഷ്യക്കാരുടെയും ധാരണയെന്നും സര്‍വേ റിപ്പോര്‍ട്ട്‌ പറയുന്നു. ദിനോസറുകളുടെ കാലത്ത്‌ മനുഷ്യരുണ്ടെന്നു 30 ശതമാനത്തോളം റഷ്യക്കാരും വിശ്വസിക്കുന്നതായും സര്‍വേ പറയുന്നു. പുരുഷന്മാരേക്കാള്‍ കുറവാണ്‌ സ്‌ത്രീകളുടെ പൊതുവിജ്‌ഞാനമെന്നും ഈ സര്‍വേ കണ്ടെത്തിയിട്ടുണ്ട്‌. എല്‍.പി സ്‌കൂള്‍ വിദ്യാര്‍ഥികളുടെപോലും വിവരം തങ്ങളുടെ ആളുകള്‍ക്കില്ലല്ലോ എന്നോര്‍ത്തപ്പോള്‍ ആദ്യം പത്രത്തിന്റെ മേലധികാരികള്‍ക്കു നാണക്കേടു തോന്നി. എന്നാല്‍, ഇക്കാര്യം ലോകമറിഞ്ഞാല്‍ അപമാനമുണ്ടാവുമെങ്കിലും അടുത്ത സര്‍വേയ്‌ക്കു മുമ്പ്‌ റഷ്യക്കാരുടെ വിവരം മെച്ചപ്പെടാന്‍ ഈ റിപ്പോര്‍ട്ട്‌ സഹായിക്കട്ടെ എന്ന പ്രാര്‍ഥനയോടെയാണ്‌ ഇവര്‍ ഇത്‌ പ്രസിദ്ധീകരിച്ചത്‌.