മ്യാവൂ... മ്യാവൂ... താളത്തില്‍, അല്‌പം നീട്ടിയുള്ള പൂച്ചകളുടെ ശബ്‌ദം കേള്‍ക്കുന്നതു തന്നെ ഒരു രസമാണ്‌. എന്നാല്‍, ബ്രിട്ടണിലുള്ള സ്‌മോക്കി എന്ന പൂച്ചയുടെ ശബ്‌ദം കേട്ടാല്‍ റോഡിലൂടെ പോകുന്നവരുപോലും ഒന്നു ഞെട്ടു. എന്തൊരു ശബ്‌ദമാ ആ നാശം പിടിച്ച പൂച്ചയുടേതെന്നാണ്‌ അയല്‍ക്കാരും നാട്ടുകാരും സ്‌മോക്കിയെക്കുറിച്ചു പറയുന്നത്‌. ഇതുകേള്‍ക്കുമ്പോള്‍ സ്‌്മോക്കിക്ക്‌ അഹങ്കാരം അല്‌പം കൂടും. കാരണം, സാധാരണ പൂച്ചകളേക്കാള്‍ മൂന്നിരട്ടി ശബ്‌ദത്തിലാണ്‌ സ്‌മോക്കിയുടെ കരച്ചില്‍. മറ്റു പൂച്ചകളുമായി കടിപിടികൂടുമ്പോള്‍ ദേഷ്യത്തില്‍ പുറപ്പെടുവിക്കുന്ന ശബ്‌ദം കേട്ടാല്‍ ചെവിപൊട്ടിയതുതന്നെ.93 ഡെസിബെല്‍ ശബ്‌ദത്തിലൊക്കെയാണ്‌ ഈ പൂച്ചയുടെ ശബ്‌ദം. ശബ്‌ദം അളക്കുന്ന യൂണിറ്റാണ്‌ ഡെസിബെല്‍. തിരക്കുപിടിച്ച സിറ്റി ട്രാഫിക്ക്‌ ശബ്‌ദത്തെപ്പോലും സ്‌മോക്കിയുടെ കരച്ചില്‍ തോല്‍പ്പിക്കും. സാദാപൂച്ചകള്‍ ശരാശരി 25 ഡെസിബെല്‍ ശബ്‌ദം പുറപ്പെടുവിക്കുമ്പോള്‍ സ്‌മോക്കിയുടെ ശരാശരി ശബ്‌ദം 80 ഡെസിബെല്ലാണ്‌. 12 വയസുള്ള ഇവള്‍ മുറിയിലുണ്ടെങ്കില്‍ ടെലിവിഷന്‍ ഫുള്‍ വോളിയത്തില്‍ വയ്‌ക്കേണ്ടിവരുമെന്നാണ്‌ ഉടമസ്‌ഥരായ റൂത്തും മാര്‍ക്കും പറയുന്നത്‌. ഏറ്റവും ഉയര്‍ന്ന ശബ്‌ദം പുറപ്പെടുവിക്കുന്ന പൂച്ച എന്ന ഗിന്നസ്‌ റെക്കോഡിനു ശ്രമിക്കുകയാണ്‌ സ്‌മോക്കിയുടെ ഉടമസ്‌ഥര്‍.
No comments:
Post a Comment