രക്‌തസമ്മര്‍ദം ആളെക്കൊല്ലുന്നൊരു രോഗമാണ്‌. ലക്ഷക്കണക്കിനാളുകളാണ്‌ രക്‌തസമ്മര്‍ദത്തെ തുടര്‍ന്ന്‌ ലോകത്ത്‌ ഓരോ വര്‍ഷവും മരിക്കുന്നത്‌. എന്നാല്‍, രക്‌തസമ്മര്‍ദം വരുമ്പോഴേ അറിഞ്ഞാല്‍ ഈ മരണങ്ങളില്‍ ഭൂരിപക്ഷവും ഒഴിവാക്കാമെന്നാണ്‌ വൈദ്യശാസ്‌ത്രം പറയുന്നത്‌. ഇതിനൊരു പരിഹാരമാവുകയാണ്‌ രക്‌തസമ്മര്‍ദം അളക്കുന്ന വാച്ച്‌. സാധാരണ ഒരു വാച്ചുപോലെ ധരിക്കാവുന്ന ഇവ ഒരോ നിമിഷവും രക്‌തസമ്മര്‍ദത്തെ അളന്നുകൊണ്ടിരിക്കും.രക്‌തസമ്മര്‍ദത്തില്‍ വ്യതിയാനം വന്നാല്‍ ഇതിലെ അപായ മണിമുഴങ്ങും. അങ്ങനെ ഇവ ധരിക്കുന്ന ആള്‍ക്ക്‌ രക്‌തസമ്മര്‍ദം ദോഷകരമായ രീതിയില്‍ ഉയര്‍ന്നാല്‍ അറിയാന്‍ സാധിക്കും. ഹൃദയാഘാതങ്ങളില്‍നിന്നും പക്ഷാഘാതങ്ങളില്‍നിന്നും രോഗികളെ രക്ഷിക്കാന്‍ ഈ വാച്ചിനു സാധിക്കുമെന്നാണ്‌ ഡോക്‌ടര്‍മാര്‍ പറയുന്നത്‌.
ജേര്‍ണല്‍ ഓഫ്‌ അമേരിക്കന്‍ കോളജ്‌ ഓഫ്‌ കാര്‍ഡിയോളജിയിലാണ്‌ ഈ വാച്ചിനെക്കുറിച്ചുള്ള റിപ്പോര്‍ട്ട്‌ വന്നത്‌. ലീസ്‌റ്റര്‍ യൂണിവേഴ്‌സിറ്റിയും സിംഗപ്പൂരിലെ ശാസ്‌ത്രജ്‌ഞരും സഹകരിച്ചാണ്‌ ഈ വാച്ച്‌ വികസിപ്പിച്ചത്‌.
എന്നാല്‍, ഈ വാച്ച്‌ വിപണിയില്‍ ലഭ്യമാകാന്‍ രണ്ടു-മൂന്നു വര്‍ഷം കാത്തിരിക്കേണ്ടിവരുമെന്നുമാത്രം. എഴുപതിനായിരത്തോളം രൂപയായിരിക്കും ഈ വാച്ചിന്റെ വിലയെന്നാണ്‌ സൂചന.
No comments:
Post a Comment