ഇരുപത്തിയൊന്നുകാരിയായ ഐറിന്‍ തോമസിനെ വിളിക്കുന്നത്‌ രാത്രിയുടെ ദേവതയെന്നാണ്‌. കാരണം അമേരിക്കയിലെ മാന്‍ഹാട്ടണിലാണ്‌ രാത്രിയില്‍ കാവല്‍നില്‍ക്കുന്ന ഈ യുവതിയുള്ളത്‌. മാന്‍ഹാട്ടണിലെ ഭവനരഹിതരെയാണ്‌ രാത്രി സൂപ്പര്‍ഹീറോയായ ഐറിന്‍ സംരക്ഷിക്കുന്നത്‌. ഇവര്‍ക്കു ഭക്ഷണമുള്‍പ്പെടെയുള്ളവ എത്തിച്ചുകൊടുക്കാനും ഐറിന്‍ പരിശ്രമിക്കുന്നു. സൂപ്പര്‍ഹീറോ എന്ന വിശേഷണം പേരിലും പ്രവര്‍ത്തിയിലും മാത്രമല്ല വേഷവിധാനത്തിലും ഐറിന്‍ പ്രകടിപ്പിക്കുന്നു.സൂപ്പര്‍ഹീറോ കഥാപാത്രമായ ക്യാറ്റ്‌ വുമണിന്റെ വസ്‌ത്രധാരണ ശൈലിയിലാണ്‌ ഐറിന്‍ അനുകരിക്കുന്നത്‌. മുഖംമറച്ച്‌, ലെതര്‍ വസ്‌ത്രങ്ങള്‍ ധരിച്ചാണ്‌ മാന്‍ഹാട്ടണിലെ രാത്രി സംരക്ഷണത്തിനായി ഐറിന്‍ രംഗത്തിറങ്ങുന്നത്‌. മാന്‍ഹാട്ടണിലെ തെരുവുകളില്‍ കിടന്നുറങ്ങുന്ന ഭവനരഹിതരായവര്‍ക്കെതിരേയുള്ള അതിക്രമങ്ങളെ ചെറുക്കാനാണ്‌ ഐറിന്‍ സൂപ്പര്‍ ഹീറോയായി വേഷം ധരിച്ചത്‌.
ജീവിതം ബോറടിച്ചതിനെത്തുടര്‍ന്നാണ്‌ ഐറിന്‍ വ്യത്യസ്‌തമായെന്തെങ്കിലും ചെയ്യണമെന്ന ആഗ്രഹത്തോടെ തെരുവിലെത്തിയത്‌. നിക്‌സ് എന്നാണ്‌ തന്റെ സൂപ്പര്‍ ഹീറോ അവതാരത്തിന്റെ പേരായി ഐറിന്‍ സ്വീകരിച്ചിട്ടുള്ളത്‌. ഗ്രീക്ക്‌ വിശ്വാസമനുസരിച്ച്‌ രാത്രിയുടെ ദേവതയാണ്‌ നിക്‌്സ്‌.
ഐറിനു കൂട്ടായി റിയല്‍ ലൈഫ്‌ സൂപ്പര്‍ ഹീറോ പ്രോജക്‌ടുമുണ്ട്‌. സൂപ്പര്‍ ഹീറോയായി വേഷം ധരിച്ച്‌ കുറ്റകൃത്യങ്ങള്‍ക്കെതിരേ പ്രവര്‍ത്തിക്കുന്നവരുടെ കൂട്ടായ്‌മയാണ്‌ റിയല്‍ ലൈഫ്‌ സൂപ്പര്‍ ഹീറോ പ്രോജക്‌ട്. സൂപ്പര്‍ഹീറോയായി വസ്‌ത്രം ധരിച്ച്‌ അക്രമത്തിനെതിരേ പോരാടുന്നത്‌ മറ്റുള്ളവര്‍ക്കു പ്രചോദനം നല്‍കുമെന്നാണ്‌ ഐറിന്‍ പറയുന്നത്‌.
No comments:
Post a Comment