മാനസികോല്ലാസത്തിനു വേണ്ടിയാണ്‌ ആളുകള്‍ വിനോദയാത്രകള്‍ നടത്തുന്നത്‌. മലയും കാടും പുഴയും മൃഗങ്ങളുമൊക്കെ കണ്ട്‌ മനസുകുളിര്‍ക്കാമെന്നാണ്‌ ടൂര്‍ സംഘാടകര്‍ വിനോദസഞ്ചാരികള്‍ക്കു നല്‍കുന്ന വാഗ്‌ദാനം. എന്നാല്‍, ഇതില്‍നിന്നെല്ലാം വ്യത്യസ്‌തമായി ഒരു വിനോദയാത്ര സംഘടിപ്പിക്കാന്‍ തയാറെടുക്കുകയാണ്‌ ഒരു ബ്രിട്ടീഷ്‌ ടൂര്‍ ഓപ്പറേറ്റര്‍. ലോകത്തെ ഒരു ടൂര്‍ ഓപ്പറേറ്റര്‍മാരും കൈകടത്താത്ത പ്രദേശത്തേക്കാണ്‌ ട്രയല്‍ റൈഡിംഗ്‌ യുകെ എന്ന ബ്രിട്ടീഷ്‌ കമ്പനി വിനോദയാത്രക്കാരെ ക്ഷണിക്കുന്നത്‌. 2.1 ലക്ഷം രൂപ മുടക്കാന്‍ തയാറുള്ള ജീവനില്‍ കൊതിയില്ലാത്തവരെ ആറു ദിവസം ഇറഖ്‌ ചുറ്റി കാണിക്കാമെന്നാണ്‌ ഇവരുടെ വാഗ്‌ദാനം.ഇറാഖില്‍ ആറുവര്‍ഷത്തോളം സേവനം അനുഷ്‌്ഠിച്ച ബ്രിട്ടീഷ്‌ സൈനികനായ സ്‌റ്റീവ്‌ അസ്‌കിനാണ്‌ ഈ ആശയം അവതരിപ്പിച്ചത്‌. 1500 കിലോമീറ്റര്‍ ദൂരത്തില്‍ ഇറാക്കിന്റെ വ്യത്യസ്‌ത ഭൂവിഭാഗങ്ങളിലൂടെ നിങ്ങള്‍ക്കു സഞ്ചരിക്കാമെന്നാണ്‌ സ്‌റ്റീവിന്റെ വാഗ്‌ദാനം. യാത്രയ്‌ക്ക് എ.കെ 47 തോക്കുകള്‍ ഏന്തിയ സുരക്ഷാഭടന്മാര്‍ കാവലുണ്ടാകുമെന്നും കമ്പനി വാഗ്‌ദാനം ചെയ്യുന്നുണ്ട്‌. പോരാട്ടങ്ങളും ആളുകള്‍ മരിച്ചുവീഴുന്നതും തീവ്രവാദികളെയുമൊക്കെ കണ്ട്‌ കടുത്ത ചൂടിലൂടെ ഒരു അവിസ്‌മരണീയ യാത്രയെന്നാണ്‌ ഈ ഇറാഖ്‌ വിനോദയാത്രയെ ടൂര്‍ ഓപ്പറേറ്റര്‍മാര്‍ വിശേഷിപ്പിക്കുന്നത്‌.
ഇരുപതുവര്‍ഷത്തിലേറെയായി വിനോദസഞ്ചാരികള്‍ എത്താത്ത പ്രദേശമാണ്‌ ഇറാഖ്‌. ലോകത്തെ ഏറ്റവും അപകടം പിടിച്ച സ്‌ഥലമെന്നാണ്‌ ഇറാഖിനെ വിശേഷിപ്പിക്കുന്നത്‌. അടുത്ത വര്‍ഷം ആദ്യമാണ്‌ ഇറാഖിലേക്കു വിനോദയാത്ര നടത്താന്‍ സ്‌റ്റീവിന്റെ കമ്പനി ഒരുങ്ങുന്നത്‌.
No comments:
Post a Comment