കുറ്റം മയക്കുമരുന്നു കടത്ത്‌; പ്രതി പ്രാവ്‌

മയക്കുമരുന്നു കടത്തിയ കുറ്റത്തിനു അപൂര്‍വമായൊരു പ്രതിയെ കൊളംബിയന്‍ പോലീസ്‌ അറസ്‌റ്റു ചെയ്‌തു. കാലുകളില്‍ 45 ഗ്രാം മയക്കുമരുന്നുകള്‍ കെട്ടിവച്ച നിലയിലായിരുന്നു പ്രതി. ബുകാരമങ്കയിലെ മോഡെലോ ജയിലില്‍ മയക്കുമരുന്ന്‌ എത്തിക്കാന്‍ ശ്രമിക്കവേയാണ്‌ പ്രതി പോലീസ്‌ പിടിയിലാവുന്നത്‌. ജയിലിനുള്ളില്‍ പ്രവേശിച്ച്‌ മയക്കുമരുന്ന്‌ കടത്താന്‍ കഴിവുള്ള ഈ വിരുതന്‍ ആരാണെന്നല്ലേ. തൂവെള്ള നിറത്തിലുള്ള ഒരു പ്രാവാണ്‌ കുറ്റവാളി. ജയിലിനുള്ളില്‍ പറന്നുയരാന്‍ പറ്റാതെ കുടുങ്ങിയതായിരുന്നു പ്രതി. പ്രാവിനെ രക്ഷിച്ച്‌ ജയിലിനു പുറത്തേക്ക്‌ പറത്തിവിടാമല്ലോ എന്നു കരുതി സമീപിച്ചതാണ്‌ ജയില്‍ അധികൃതര്‍. എന്നാല്‍, പ്രാവിന്റെ കാലില്‍ ചെറിയൊരു പൊതി കെട്ടിവച്ചിരിക്കുന്നത്‌ അവരുടെ ശ്രദ്ധയില്‍പ്പെട്ടു. അത്‌ അഴിച്ച്‌ പരിശോധിച്ചപ്പോഴാണ്‌ പോലീസുകാര്‍ അത്ഭുതപ്പെട്ടത്‌. 40 ഗ്രാം മരിജുവാനയും 5 ഗ്രാം കൊക്കെയിനുമായിരുന്നു ആ പൊതിയില്‍. തടവുപുള്ളികള്‍ക്ക്‌ പുറത്തുനിന്നും മയക്കുമരുന്നു കടത്താനായിരുന്നു പ്രാവിനെ ഉപയോഗിച്ചിരുന്നത്‌. കസ്‌റ്റഡിയിലെത്ത പ്രാവിനെ മൃഗസ്‌നേഹികളുടെ സംഘടനയുടെ സംരക്ഷണയിലാക്കിയിരിക്കുകയാണ്‌ പോലീസ്‌